تونس بلادي

388e jour après Ben Ali

أكثر من 50 سنة إستقلال. نهار 20 مارس عام 1956 تحصلت تونس على استقلالها

أكثر من 50 سنة ، عباد عطات رواحها و صغارها و بدوناتها على خاطر فكرة وحدة : الإستقلال.بورقيبة وأصحابو ، أياماتها، كانوا يقولو للناس : “ما تخليش القاوري وكال الحلوف يحكم فيك يمصلك عرقك ويقرر في بلاصتك” … التوانسة اقتنعوا بها الكلام ، وهبطوا عاطين صدورهم للكرطوش، بش ينجمو يقررو مصيرهم بيديهم

إليوم بعد أكثر من خمسين سنة إستقلال ، كي نتفكر إلي ماتوا ، نقول صحة ليهم، سلكوها، هوما الوحيدين إلي قرروا بلحق مصيرهم بيديهم… أربعة وخمسين سنة ملي خرجنا سيدي العكري م القصور، ثلاثة وخمسين سنة ملي سيقنا باردو وقرطاج ونطرنا سيدي الباي .. التوانسة وقتها في بالهم إلي، وأخيراً ، هوما إلي بش يسكنوا القصور، في بالهم إلي حد ما عاد بش يمصلهم عرقهم ويعطيهم على تراميهم … لوين فسرلهم بورقيبة الوضعية، وقالهم : “أركحو توا .. يزي ما قررولنا الباي ولفرنسيس، توا وقتي أنا وصحابي ومرتي..”..وبدا التونسي ياكل الصرفاق ورا الصرفاق ، وبدا يفيق إلي تكعبرتلو في النازلة، إلي الفرق بين البارح واليوم مهوش في الصرفاق ، الفرق في اليد إلي تصرفق

أربعة وخمسين سنة، و اليوم كي نقول تونس بلادي، نقولها من غير ما نخمم، على خاطر كي نخمم، نحس روحي زكيم، بهيم، هايشة بكمة … تونس بلادي، خاطر هكا علموني في المكتب، هكا تحكيلي الشروق، هكا يكعررلي بابا كل نهار، والحقيقة إلي تونس غربتي … كل وين نجي نحل فمي، يسكروه، وديما فما شكون يقول : “ياخي في بالك البلاد مسيبة؟؟ البلاد عندها أماليها..” .. حس الصرفاق يفهمني إلي مانيش تابع “أماليها” … تونس بلادي، بالأمارة كي نجي نحوس في الشط، يوقفني حاكم ويقلي : “هذا شط تاج محل، ممنوع عليك تتعدى من هنا، مخصص للتوريست..” … تونس بلادي، بالأمارة كي نمشي في الشارع ، لازمني نحضر جواب ال-“اش تعمل هوني” إلي ينجم يحبسني عليها أي شرطي

تونس بلادي، بالأمارة ديما فما شكون ما يخلينيش ندخل إدارة ولا اوتيل ولا مسرح ولا جامعة .. “تونسي انتي، اش تعمل هوني” … تونس بلادي،هذاكة علاش نهار كامل من شركة لشركة نفركس في خدمة، ووجهي الاسمر ما يعجبش “ياسر تونسي” .. تونس بلادي، هذاكة علاش كل وين نمشي للاستعجالي ، يطفيوني 10 سوايع ، وكي نبدا نطلع الروح، يقولولي “مش موصي عليك حد انتي ، برى روح..” … تونس بلادي، هذاكة علاش عندي الحق ننقد العالم الكل ، إسرائيل ، فلسطين، أمريكيا، مدغشقر ،نيكاراغوا ، سوزيلاندا، أما كي نقول "تونس"، يقولولي “اش مدخل ديربك” … تونس بلادي، هذاكة علاش يقولولي : “برى روح يا عربي” ولا “برى روح يا أمازيغي” ولا “برى روح يا كافر” ولا “برى روح يا جبري” … أربعة وخمسين سنة تعدات، وتونس تنجم تعمل كل شي، إلا أني تتحكم في روحها وتحب روحها… أربعة وخمسين سنة ملي خذينا الإستقلال، وخليناه في قجر وزارة الداخلية … بورقيبة عمل الباهي؟؟ أيه هذاكة علاش التاريخ فرحان بيه … بن علي يعمل في الباهي؟؟ هو زادة تو يفرح بيه التاريخ …

المشكلة إلي التونسي ماهوش عايش في “التاريخ” … روح نيك أمو التاريخ، أنا اعطيني بلادي أربعة وخمسين سنة، وتونس بلادي، بهيم زكيم منيك معفط وإلي تحب انتي ، أما تحب ولا تكره ، تونس بلادي، كيفي كيف جدودي، يا نفك ديربها ، يا نموت وعصبة ليها.. تونس بلادي