رحلة تكريز

388e jour après Ben Ali

برشة عباد عايشة في هل بلاد ماهيش فاهمة منها شي
كي نجي نسئل روحي علاش نحب نكرز علاش مانيش ساكت وراكش وكيف ماقال بندير مان ماكلين شاربين ديمة راكشين في الخير عايشين بالحرية شايخين أما كان جا للحرية وجود في هل بلاد راهو ماكرز حد
أما كيف ما قال تحيفة إلي هو لعبد لله “مأساة التونسي أنّه كان بادئ ذي بدء طفلا” على خاطر نتذكر و انا صغير إلي ماكنت نحب شيء فدنيا لا نهار حلمت بش نولي حاجة على خاطرني كنت نشوف إلي تونس حلوة كيف محبتها أما ماكنتش فاهمها بطول لوقت كل مرة نرى حاجة نقول شبي هل عباد هكى كيفاش هذا سرق هذا؟ وكيفاش هذا هبل؟ ولاخر شبيه مد يدو؟ وهذاشبيه إتبع فل فساد؟ شبي هذا يتكيف ويعرف إلي قاعد يضر في روحو؟ شبي هذا كل خيط وفرحان؟ كي نتعدى على حي فقر ؟ووجوه فقر نقول شبيهم لعباد هاذم هكة؟ علاش مايخدموش؟ علاش …..
وتوا كي بديت نفهم هاالدنيا وهل البلاد فهمت علاش ماكنتش نحلم بشيء. قبل كنت حر، قبل نعمل إلي نحب ونقول إلي نحب توا فين مانمشي نلقاهم معادش فاهمين معنى الحرية. كان واحد تقولوا تكلم ونتي مصكرلو فومو كيفاش تحبو يتكلم؟ نزيد نكبر شوية، نلقى روحي نزيد نتربث .هذا لكل علاش؟ على المفاهيم الغالطه إلي تعلمتها في صغري. يلزمك ديمة مع لحق وتعاون الضعيف وكلو حكاية أما توا خوية دوبك دوب روحك أول ماحبيت نحل فمي فالستاد كلانا الخبط فالصف وفي ال ستاد وصور صور هذا شد حبس لاخر الله أعلم آش صار فيه غاب غاب وخرج أزرق !!
كي حبيت نحكي نخرج في مسيرة هزوها لكل وفي أخبار تونس تعيش تونس مسيرة يومية مع اخواننا الفلسطينيين الهو أعلم وقتاش !!
باهي قراونا في المكتب على الدستور إلي فيه الرئيس ماعندوش الحق يشد الكرسي أكثر مل ٢٠ عام باهي ما لا هذا فاش يعمل !!
والتفرقة بين السلط فيني؟ كي بديت نحل عنايا نلقى هذا يتشد مع هذا لخر يعمل تلفون !!
هذا يقضي لهذا وهذا ولد فلان وليد بابا يخرج ولاخر ماكلها ماكلها و يدزهولو زادة علاش؟ !!

وليد صغير نحب نعيش راجل كلاها وكمل حياتو يا اما ميبون يااما ورا لحديد علاش !!

كي نسمع لاخبار نسمع ساعتين وهو سي نمي
هو سي نمي مشى علاش؟ ألف حكاية صايرة في أخواتنا في هل بلاد مانسمع منها كان إلي احبونا نسمعوه وكي ريت صحاب وحباب كي حبوا يعيشو رجال يلقاو ساقيهم تهزت لاخر كي حب يكرز ومعرفش كيفاش إنتحر. لاخر مشى لفلسطين، لاخر فجر روحو ولي حرق ولي ولي مخو بالقراية تحرق في الشارع يبيع في الحبق !! علاش التونسي إلي يخرج البرة يبدع !! كيفاش واحد تنحيلو الحرية وتقولو أبدع !! انا اليوم يمكن لقيت شكون مكرز كيفي ولا أكثر !! أما غيري عاش مكرز وحدو ومات مكرز وحدو يمكن انا صغير عالتكريز أما والله كان منكرزش ماعنديش علاش عايش والله لاهي بلاد محلاك يا تونس مانغرهم ومحلاك باللخرين إلي دمهم روالك ترابك !! وعافسة عليه كلابك !! مهما تنساونا عمركم مابش توصلوا تسكتونا هاذاك علاش كالزنا كي هل بلاد ما عادش فيها حاسيلوا تحب تعيش فيها يا طحان يا امسخ يا مهبول وانا والله كنت نستغرب منهم وانا صغير معاش نستغرب كان نولي واحد منهم وانا كبير خاطر واحد كان ماهوش مسيب تكريزو والله هذيكة هي الطريقة الوحيدة باش ما نوليش كيف الي سميتهم

• لمكرز الصغير صحيح مهوش ليبر أما تكريزو بش افيض عليكم