تاريخ تونس وبداية التكريز

388e jour après Ben Ali

اربعة وخمسين سنة تعداو على الاستقلال الرسمي لتونس ما قعد منهم كان باكو سواقر سوفنير بنين يذكرنا ببنة الاستقلال الي جابهولنا جدودنا بالرسمي ناس ماتت و عباد ريوسها تقصت و ناس تنفات في الصحراء و نساء تزغرد كي يبدى الكرطوش يلعلع و الفلاقة طايحة كالذبان فرانسا هبلت من شعب جاهل جهلهم و نساهم في حقوق الانسان الي في بالهم بدعوها و كمل عليهم راجل كي بورقيبة لعبهالهم بخباثة و طربق عليهم المنداف ياخي هزو رواحهم و مشاومكرزين كيفاش حصلو و مرمدهم الشعب الي كان حاقرينو

بعد ها التاريخ الكبير و يعمبو الوقت الخايب يجينا و على عكس التوقعات مستعمر جديد ما يشبه للفرنسيس في شيء لمها من صفات البلادة و البهامة و صحة الرقعة زادة وحرنا فيه سنين و ما نجمناش نقلعوه لتوا تمصمر و باش ياكللنا ريوسنا الكل و مازال حي ريوسنا و ترمنا شابت و هو تبارك الله عليه مازال ترنكوش شعرو بالمردومة عليها كوش قومينة ما زال يطنطن و كان جا بورقيبة يرحمو ما صكرش اللعب راهو عرس بربعة و من كل كعبة جاب فريق كورة قدم عيني ما تظرو وقتها راهي خلات نزيدوهم لجمعية المدام خيرلنا نرحلو للربع الخالي فماش ما نلقاو وين نعيشو
عاد السيد و اسمو الزين اهاوكا اسمو على جسمو طلع مهف على الجموع الكل انا فرنسا و امريكا و الصهيونيين حكاية فارغة قدام الربروب متاعنا سي الزين خلق فكرة جديدة و تيار قوي بعد انهيار الاتحاد السوفياتي التيار هذا اسمو التبلعيط عفانا و عفاكم الله التبلعيطة الاولى هي لا رئاسة مدى الحياة بدالنا بالحكاية هذية باش شعبنا الدغفة تجد عليه الحكاية و يبدى كالعادة يصفق و يغنيلو في بالروح بالدم نفديك يا

التبلعيطة الكبرى و من ثمة نبدى نكرز وقت الي حل بن علي فمو و قاللنا راهو يا جماعة معايا انا احكي و اكتب كيما تحب و قول الي في بالك خاطرني نمن بحرية التعبير و الصحافة وقتها الناس الغفاصة الكل في تونس ديما يجد عليهم كل شي ابدى بالخوانجية ماهم مساكن جماعة مدبية و كتاب و البريمة فيهم معلم و الا مستوى جامعي علوم انسانية لمدهم قطوس في شكارة و رماهم في البحر و خلالو الجو لجماعة مريشين متاع شيوعية و فقر و ميزيريا مثالهم الاعلى فلاسفة روسيا ناسيين فلاسفة تونس و العريبة و يوردولنا في الحفتريش الي ماكلين كبوط ترافل من عند الراسماليين على كل ، الحفتريش هذوما زعبلا شاخ عليهم و هوما في بالهم مناضلين لابسين الشاش الفلسطيني و يعملو في كعبات بيرة سلتيا على أنغام مرسيل خليفة في بالهم باش يجيبولنا فلسطين حاسيلو الشيوعيين هذوما خذاو حكاية المعارضة التونسية وفقة و زاد سهل مهمة زعبلا في تفرشيخهم خاطرهم جماعة كفار ما يمنوش بربي و كان يقطعهم طروف طروف حد ماهو باش يحز عليهم.
قعد الشعب تونسي كيليتيم بلا بو كانو اليتامى يسميوهم اطفال بورقيبة توا مات بورقيبة ولاو و لاد الزين و من بعد ولاد ليلى
عاد هاليتامى ما يعرفوش السياسة فما كان التجمع و بال عليه عفوا بن علي النهار و ما جاب النهار و هوما يزغرتولنا في وذنينا جبنالكم المي جبنالكم الضو قدينالكم السما قدينالكم الارض رحمناكم نعمناكم باركنالكم و ناقص كان في لخر يقولنا خلقناكم في أحسن تكوين ، جاب ربي جابولنا الانترنات باش توسوسلنا في صدورنا و نقولولهم راهو فما كفار كيفنا يبعبص فينا الشيطان و يقوللنا اتكلمو يا كوازي اعملو حاجة تصلح في حياتكم و موتو على دينكم الاول دين الجدود.
نحنا مازلنا كيبدينا نحكيو على امورنا و شعورنا و سي زعبلا مسيب علينا بنتو الكبيرة تتصرف فينا تي معناها مسهولة عل الانترنات طاحت للا تصرفق فينا وتصكرنا في افامنا كالغشاشر الصغار قلنا برا ميسالش دلولة بوها مش لازم نهنتلوها و هي قريب تعرس بولد كريزة توا تجرب العرس و تتلهى بألعاب أخرى ياخي للا خرات فيه و برجولية انا عروبي برشة و نبزان من عند مرا ما هوش في قاموسي قلنا فك علينا من الخبط و التجودير والعبها نقنوق تسلك و يا ليتني قعدت راجل سيبت علينا كلاب النشة متاعها هي وبوها وبداو يحصرو فينا بشوية بشوية كالفيران حتى استفردوا بجماعتنا و استفعلوا فيهم مات الي مات و تحبس الي تحبس و البقية مش لازم تعرفوها

وقتها حسيت روحي كي كارلوس و تذكرت جدتي كي تغنيلي في خمسة الي لحقو بالجرة وعرفت اني صاحب العملة المرة و اني باش نعدم في الطريق العام و تذكرت تونس و تذكرت الا خلدي يا دمانا الغوالي و فهمت الي زعبلا أصلو ماغولي مالتاتار يبدع في التعذيب و القتل و الترهيب و اني قبيلتو كيفو تأتي على اليابس و الاخضر و تحرق في الكتب و ترهب في العباد والي لحكاية هذه ما زالت مطولة وانو تونس مش باش تقوملها قايمة على خاطرنا شعب طحان قوادة صبابة عفاطة نتبعو في نسانا و ما عادش فينا رجال الي هذا خايف على نقبة خرا في الحبس و خايف على كرشو البرا من الحبس و حتى البرا منو في كلو الحالات ماكلتو الي خايف عليها باش تتعدى على نقبة الخرى هذاكة علاش تونس و للاسف نقبة خرى و رئيسها كالعذر دمالة في نقبة خرى و عيد الاستقلال عيد الخرى ويعمبو الخوف الى ردنا كلنا شعب خراي

رواه السرند عن واترمان