المعارضة في بلاد الطرنني

388e jour après Ben Ali

سنوات والمعارضة التونسية تشكي و تبكي و كل ما يتشد واحد منهم في الحبس يمشيو يجريو للجرايد الفرنسوية و لبرانية : شفتو آش عملولنا ? راهم ضربونا ? ويني حقوق الانسان ويني العدالة ? آنا مافهمتش ياخي  23 سنة هما ما زالو غادي ? هال ايامات سبهم واحد مصطك عامل فيها صحافي (صحافي الهانة و رقود الجبانة) يكتب في جريدة ما جاتش حتى بابيي توالات و قال عليهم تابعين للموساد

هو لا محالة بهيم ياسر الى حد انو يتصور الي الموساد ما عندو ما يعمل كان يتلهى بتونس المريشة الى تفتفوها الصحاح ياخي قاموا يندبوا و يخرجو في عريضة و كالعادة ديما دموع ...

.

نحب نقول للمعارضة  الي في تونس راكم كرزتونا نفختوهملنا . ال عام12   تبقاو  طول عمركم كعبتين و كعبة زوز مناس تنبحو وحدكم ، تعرفوش علاش ? خاطركم ما تعرفوش تحكيو مع الناس ، ما تعرفوش تجيبوهم ليكم ، الي يتكلم منكم راهو يعاود في الكلام متاع المرة الي فاتت بلغة اخرى  وفات فلوسكم   كي الجموع الي تسبو فيها مالصباح لليل.

بربي تنجموش تقولونا علاش المعارضة ما تلمدتش الكلها في حزب واحد الي يومنا هذا ? يا كل واحد فيهم يحب يولي بطل وحدو، ولا ما يتفاهمش  مع لخرين . و اذا كان ما يتفاهمش مع لخرين معناها  موش مشكلتو المصلحة الوطنية ، هو صحيح الي مقوش ما يمشيش مع الخوانجي والخوانجي ما يحكيش  مع العلماني و العلماني يفد مالخوانجي وبر هكاكة العزوزة هزها الواد وكمل و تقول العام صابة .

الي يحب يولي بطل وحدو فما شكون قطعلو بالبلاصة وشد يفشخ فيها على بعضها و يضهرلي الي  عامل فيها باندي مالمعارضة كلى من قبل على راسو لين كسح.

هذاك علاش يلزمكم توا تيزيو ما البكاء يا تلعبو فيها باندية بالرسمي و كي تاكلو طريحة تصكرو افماكم   و الا تكونو شويا ذكيين و تعملو جمعية معا بعضكم بالكشي تجيبوها بالكثرة موش بقلة البركة.

آنا وأعوذ بالله من كلمة آنا نقوللكم لمدوا رواحكم و اعملو جمعية صحيحة من بعد براو لو احكيو معاه  ،بالسياسة و السيوسة الفيل يبوس الناموسة...

تي حتى الليبي جاركم فهمها من هاك العام آما بالمقلوب الجماهيرية الشعبية هي الثنية الوحيدة اللي باش تخرجكم من التشرذم متاعكم .

ما ذا بيكم زادة تعملو ستراتيجية كوم ، معناها شوفولكم ناس كوارجية مزاودية ما فيها باس يكونوا موافقينكم فالراي كوميديين المهم معروفين من عامة الشعب هذوكم ناس عندهم جمهورهم والناس تحبهم تو يوليو يحبوكم تكان غدوة كوارجي يحكي بوليتيك الدنيا تتقلب ولا مزاودي يخرج غنايا كيما ارضى علينا يا لميما لام تولي النشيد الوطني الرسمي متاع البلاد.

مانحبوش مظاهرات و اعتصامات و ضارب و مضروب نحبوها دخلة كيما في الستاد فيها الجمعيات الكل والدرابووات والالوان الزاهية من شارع بورقيبة لسيدي بو والشعب يغني و يعيط تحيا بلاد الطرنني .

راني نحكي بالرسمي والفاهم يفهم ونخاطب فالقوم بما يفهمون تذكرو اوكرانيا ... موش لازم كان منقول هوني بير.

واترمان حفيد الدوعاجي                                    حقوق الطبع محفوظة